మే 24,25,26 తేదీల్లో ఇర్వింగ్ కన్వెన్షన్ సెంటరులో నిర్వహిస్తున్న 6వ అమెరికా తెలుగు సంబరాల ప్రణాళికా సదస్సు ఆదివారం నాడు సంబరాల సమన్వయకర్త కంచర్ల కిషోర్ ఆధ్వర్యంలో డల్లాస్‌లో నిర్వహించారు. సంబరాలకు సంబంధించిన ఏర్పాట్లపై వివిధ కమిటీల చైర్మన్లు, సభ్యులు ఈ సదస్సులో పాల్గొని మహాసభల విజయవంతానికి తీసుకోవల్సిన చర్యలపై కూలంకుషంగా చర్చించారు. ఆడియో-వీడియో, ఆహారం, ఆధ్యాత్మిక, ఆతిథ్య, మహిళా, వాణిజ్య తదితర కమిటీలకు చెందిన సభ్యులు తమ సలహాలు, సూచనలను అందించారు. ఈ వేడుకలకు రెండు తెలుగు రాష్ట్రాల నుండి పెద్దసంఖ్యలో అతిథులు హారవుతున్నారని “మనమంతా తెలుగు-మనసంతా వెలుగు” నినాదంతో నిర్వహించే ఈ సంబరాల్లో ప్రవాసులు పెద్దసంఖ్యలో పాల్గొని విజయవంతం చేయవల్సిందిగా అధ్యక్షుడు మంచికలపూడి శ్రీనివాసబాబు, సంబరాల సమన్వయకర్త కంచర్ల కిషోర్‌లు కోరారు.
