కరోనా వైరస్‌.. మానవ కణాల్లోకి ప్రవేశించి, ఇన్‌ఫెక్షన్‌ను కలిగించే తీరును కళ్లకు కట్టే ఒక బుల్లి సాధనాన్ని అమెరికా శాస్త్రవేత్తలు అభివృద్ధి చేశారు. అమెరికాలోని నేషనల్‌ సెంటర్‌ ఫర్‌ అడ్వాన్సింగ్‌ ట్రాన్స్‌లేషనల్‌ సైన్సెస్‌ (ఎన్‌సీఏటీఎస్‌) శాస్త్రవేత్తలు ఈ పరిశోధన చేశారు. కరోనా వైరస్‌పై కొమ్ము ఆకృతిలో స్పైక్‌ ప్రొటీన్లు ఉంటాయి. మానవ కణంలోని ఏసీఈ2 అనే భాగానికి అతుక్కొని, ఆ తర్వాత కణంలోకి ప్రవేశించి ఇన్‌ఫెక్షన్‌ను కలిగించడానికి వైరస్‌కు ఇవి సాయపడుతుంటాయి. ఈ ప్రక్రియ మొత్తాన్నీ పరిశీలించడానికి శాస్త్రవేత్తలు క్వాంటమ్‌ డాట్‌ అనే ఫ్లోరోసెంట్‌ నానో రేణువును రూపొందించారు. పరిశోధనల కోసం వాస్తవ వైరస్‌ను ఉపయోగించడం చాలా కష్టం. అందుకు ప్రత్యేక మౌలిక వసతులు అవసరం. క్వాంటమ్‌ డాట్‌తో ఈ ఇబ్బంది తొలగిపోతుంది. మానవ కణానికి అతుక్కోవడం నుంచి అందులోకి చొరబడటం వరకూ.. వైరస్‌ చేసే అనేక పనులను ఇది నిర్వహిస్తుంది. పైగా ఈ సాధనానికి వెలుగులీనే సామర్థ్యం ఉన్నందువల్ల వాటి తీరుతెన్నులను మైక్రోస్కోపు కింద శాస్త్రవేత్తలు క్షుణ్నంగా పరిశీలించవచ్చు.
