తెరాస నేతల ఘర్షణ రోడ్డెక్కింది. ఇరువర్గాలు దాడి చేసుకుని పరస్పరం పోలీసులకు ఫిర్యాదు చేసుకున్నాయి. వివరాల్లోకి వెళితే.. హైదరాబాద్‌ రాంకోఠిలోని రూబీ గార్డెన్‌లో పట్టభద్రుల ఎమ్మెల్సీ ఎన్నిక కోసం తెరాస సన్నాహక సమావేశం జరిగింది. ఈ సమావేశంలో మంత్రులు మహమూద్‌ అలీ, తలసాని శ్రీనివాస్‌యాదవ్‌తో పాటు గోషామహల్‌ నియోజకవర్గ నేతలు పాల్గొన్నారు. తనను వేదికపైకి ఆహ్వానించలేదంటూ ఆర్వీ మహేందర్‌కుమార్‌ నిలదీయడంతో నేతల మధ్య ఘర్షణ జరిగింది. మంత్రి మహమూద్‌ అలీ సర్దిచెప్పడంతో ఆ గొడవ తాత్కాలికంగా సద్దుమణిగింది. సమావేశం అనంతరం మంత్రులు వెళ్లిపోయిన తర్వాత తెరాస నేతల అంతర్గత కుమ్ములాటలు బయటపడ్డాయి. దీంతో మరోసారి నేతలు రెండువర్గాలుగా విడిపోయి పిడిగుద్దులతో దాడి చేసుకున్నారు. అనంతరం నారాయణగూడ పోలీస్‌స్టేషన్‌లో పరస్పరం ఫిర్యాదు చేసుకున్నారు.
