ఆస్ట్రేలియాలో గుబాళిస్తోన్న “తెలుగు మల్లి”

తెలుగు భాష కేవలం మన మాతృభాష మాత్రమే కాదు. మన జీవితాలకు వెలుగు. మన అస్తిత్వానికి ప్రతీక. మన జీవిత గమనానికి దిక్సూచి. ఆంగ్లంతో సహా ఎన్ని భాషలైనా నేర్చుకోవచ్చు. కానీ, మన మనసులు మాతృభాషతోనే వికసిస్తాయి. భావితరాల్ని తెలుగుదనానికి ప్రతీకలుగా, తెలుగు ‘ధనాని’కి వారసులుగా తీర్చిదిద్దటానికి బాధ్యత తీసుకోవాల్సింది తల్లిదండ్రులే. ఇతర దేశాల ప్రభుత్వాలు కూడా తెలుగుభాషను ఎంతో గౌరవిస్తున్నాయి. అందుకోవాల్సింది మనమే అంటున్నారు ప్రవాస భారతీయులు కొంచాడ మల్లికేశ్వరరావు. పొట్టి శ్రీరాములు తెలుగు విశ్వవిద్యాలయం అందించిన సంస్కృతి పురస్కారాన్ని అందుకోవటానికి విజయవాడ వచ్చిన ఆయనతో పంచుకున్న మాతృభాషా మధురిమలు ఆయన మాటల్లోనే…
* బహుళ జాతుల్ని, సంస్కృతుల్ని ఆదరించే దేశాల్లో ఆస్ట్రేలియా మొదటి స్థానంలో ఉంటుంది. అక్కడి ప్రభుత్వం తెలుగు భాష కోసం ఎన్నోవిధాలుగా సహకరిస్తుంది. స్థానికంగా తెలుగు బడులకు ఆర్థిక ప్రోత్సాహం ఇస్తుంది. ఉపాధ్యాయులకు వేతనాలు కూడా చెల్లిస్తుంది.
* ఆస్ట్రేలియాలో తెలుగు మాట్లాడేవారి సంఖ్య 35 వేలు దాటింది. దీంతో తెలుగును సామాజిక భాషగా గుర్తించాలని మేమంతా అక్కడి కేంద్ర ప్రభుత్వానికి విజ్ఞప్తి చేశాం. సానుకూల స్పందన వచ్చే అవకాశం ఉంది. దీనివల్ల తెలుగు రాష్ట్రాల నుంచి ఆస్ట్రేలియాకు వచ్చేవారికి వీసా సౌకర్యాలు సులభం కావడంతో పాటు ఉద్యోగ అవకాశాలు కూడా పెరుగుతాయి. ప్రభుత్వ గుర్తింపు వస్తే ప్రతి బడిలో తెలుగును ఒక అంశం (సబ్జెక్ట్‌)గా చేరుస్తారు.
* ఇప్పటికే ఆస్ట్రేలియా ప్రభుత్వ అధికారిక రేడియో తెలుగు ప్రసారాల కోసం సమయం కేటాయించింది. కార్యక్రమాలు కూడా తయారవుతున్నాయి. రెండు నెలల్లో తెలుగు ప్రసారాలు ప్రారంభమవుతాయి. ఆస్ట్రేలియాలో తెలుగువారు సాధించిన విజయాల్లో ఇదొకటి.
* అక్కడి తెలుగు పిల్లల కోసం ప్రత్యేకంగా తెలుగుబడులు నిర్వహిస్తున్నారు. అన్ని ప్రధాన నగరాల్లో శని, ఆది వారాల్లో తరగతులు జరుగుతాయి. ఒక్కో బడిలో 50 మంది దాకా పిల్లలు ఉన్నారు.
* పిల్లల్ని తెలుగు సంస్కృతికి ప్రతీకలుగా, తెలుగు భాషా వ్యవహర్తలుగా తీర్చిదిద్దటంలో అమ్మానాన్నలదే ముఖ్య పాత్ర. పిల్లలకు మన భాష, సంస్కృతుల గురించి చెప్పాల్సిందే వాళ్లే. పిల్లలు ఆంగ్లంలో మాట్లాడితే గొప్ప విజయం సాధించినట్లు పొంగిపోవటం, అదే లోకం అనుకోవటం వల్లే నేటితరం తెలుగుకు దూరమవుతోంది. మన భాషని పిల్లలకు నేర్పించాల్సింది తల్లిదండ్రులే.
* ఆస్ట్రేలియాలో అక్కడి స్థానికులు కూడా తెలుగు నేర్చుకునేందుకు ఎంతో ఆసక్తి చూపిస్తున్నారు. ఇప్పటికే కొందరు తెలుగు బడుల్లో చేరారు కూడా. మా ఇంటికి వచ్చే ఆస్ట్రేలియన్‌ ‘మీ ఇంట్లో ఉప్మా చేశారా’ అంటూ మన తెలుగు రుచుల్ని ఆస్వాదిస్తాడు(నవ్వుతూ) కూడా.
* తెలుగు ప్రాంతానికి తొమ్మిదివేల కిలోమీటర్ల దూరంలో ఉన్నాం. అక్కడ తెలుగు బంధం తప్ప ఇతర చుట్టరికాల్లేవు. తెలుగుపాశం అంత గొప్పది. ఖాళీ సమయాల్లో కృష్ణరాయబారం, పార్వతీకల్యాణం వంటి నాటకాలు వేస్తాం. తెలుగు సంఘాల కార్యక్రమాల్లో అందరం తెలుగులోనే మాట్లాడుకుంటాం. స్థానికులు రాసిన కవితలు, కథలు, ఇతర సాహిత్య ప్రక్రియలతో కవితాస్త్రాలయం పేరుతో సంకలనాలు తీసుకువచ్చాం.
* తెలుగుమల్లి పేరుతో అంతర్జాత పత్రిక నిర్వహిస్తున్నాం. ఆస్ట్రేలియాలోని తెలుగువారందరికీ ఇది సుపరిచతం. ఇప్పుడు యూట్యూబ్‌ ఛానల్‌ కూడా ప్రారంభించాం.
* ఆస్ట్రేలియాలో తెలుగు నవతరం కూడా ఇప్పుడిప్పుడే తెలుగు భాష మీద దృష్టి సారిస్తోంది. మన భాష నేర్పించమని అడుగుతున్నారు. వీరందరికోసం ప్రత్యేకంగా వాచకాలు తయారుచెయ్యాల్సిన అవసరం ఉంది. వీరందరికీ వాడుకభాష నేర్పేలా పాఠ్యప్రణాళిక తయారుచెయ్యాల్సి ఉంది. దీని రెండు తెలుగు రాష్ట్రాల ప్రభుత్వాల సహకారం కావాలి. ఈ మాత్రం సహకారం ఉంటే చాలు.. మిగిలిన బాధ్యత మేం తీసుకుంటాం.

More News

Leave a Reply

Your email address will not be published. Required fields are marked *

*

Enable Google Transliteration.(To type in English, press Ctrl+g)

UCPL-TNILIVE

© 2018 TNILIVE. All rights reserved. Write to us with suggestions, comments and questions - editor.tnilive@gmail.com