జనసైనికులు=కొదమసింహాలు

‘‘సీఎం పదవి నాకు అలంకారం కాదు.. చంద్రబాబు, లోకేశ్‌లాగా వారసత్వం కాదు.. ప్రతిపక్ష నేత జగన్‌లా తండ్రి సీఎం గనక తాను సీఎం కావాలన్న వారసత్వం నాకు లేదు. నా తండ్రి ఓ కానిస్టేబుల్‌ నుంచి పైకెదిగిన వ్యక్తి. చిన్న జీవితం నాది. మా తాత, నాన్న సీఎం అయ్యారు గనక నేనూ అవుతా అని లోకేశ్‌ అనుకున్నప్పుడు.. మా నాన్న సీఎం అయ్యారు గనక నేనూ అవుతా అని జగన్మోహన్‌ రెడ్డి ‌ అనుకున్నప్పుడు ఒక కానిస్టేబుల్‌గా జీవితం ప్రారంభించిన వ్యక్తి కొడుకు ఈ రాష్ట్రానికి ఎందుకు సీఎం కాలేడు. కచ్చితంగా అవుతాడు’’ అని జనసేన అధినేత పవన్‌ వ్యాఖ్యానించారు. జనసైనికులతో ధవళేశ్వరం వంతెనపై భారీ కవాతు అనంతరం సోమవారం సాయంత్రం ధవళేశ్వరంలో ఏర్పాటుచేసిన భారీ బహిరంగ సభలో ప్రసంగిస్తుండగా అభిమానులు సీఎం.. సీఎం అంటూ నినదించడంతో స్పందించిన పవన్‌.. మీరు చేసే నినాదం సత్యమై తీరుతుంది అంటూ పైవిధంగా వ్యాఖ్యానించారు. ఈ సభలో ముఖ్యమంత్రి చంద్రబాబు పాలనపైనా, వైఎస్‌ జగన్‌ తీరుపైనా తీవ్ర స్థాయిలో విరుచుకుపడ్డారు. వారసత్వాలతో సీఎంలు కాలేరన్నారు. ఇది తనకు మూడో ఎన్నికలని.. ఆ అనుభవాన్ని తీసుకొని 2019 ఎన్నికలకు వెళ్తున్నట్టు పవన్‌ స్పష్టంచేశారు. ‘‘లక్షలాది మంది జనసైనికులు కారుమబ్బుల్లో పరుగెత్తే పిడుగులు.. అవినీతి వ్యవస్థని ముంచేసే ఉద్ధృత జలపాతాలు.. దౌర్జన్యాన్ని చీల్చిచెండాడే కొదమ సింహాలు నా జనసైనికులు. మిలటరీ సైనికులే తప్ప భారత ప్రజలు కవాతు చేయరు. సగటు రాజకీయ వ్యవస్థ కుళ్లిపోయి అవినీతితో నిండిపోయింది. నిరుద్యోగంతో రగిలిపోతున్న యువత జనసేన కవాతులో కలిసి వచ్చారు. అవినీతిని నిర్మూలించడానికి.. దోపిడీ వ్యవస్థ అంతమొందించడానికి వచ్చారు. సగటు ప్రజాస్వామ్య విభాగాలు, బ్యూరోక్రసీ, రాజకీయ వ్యవస్థ నిర్వీర్యమైపోతుంటే.. సామాన్యులు.. మధ్యతరగతి మేధావులు, ఆడపడుచుల నుంచి ఒక విప్లవం రావాలి. రాజకీయ నాయకులకు బుద్ధి చెప్పాలి. వారిని నిలదీయాలి. దోపిడీని నిలువరించేందుకే ఈ కవాతు చేస్తున్నాం’’ అన్నారు. ‘‘ముఖ్యమంత్రి చంద్రబాబు స్వప్నించిన విజన్‌ 2020లో రెండు కోట్ల ఉద్యోగాలన్నారు.. అవేమయ్యాయి? దశాబ్దాలుగా యువతలో ఆవేశం రగిలి రగిలి ఈ రోజు జనసేన ఆవిర్భావానికి కారణమైంది. జనసేన బాధ్యతతో, క్రమశిక్షణతో నడిచే పార్టీ. నా సంస్కారాన్ని అనేకమంది రాజకీయ నాయకులు అర్థంచేసుకోవడంలేదు. నాది ప్రజల పక్షం. రాజకీయ వ్యవస్థను నడపాల్సిన పెద్దలే కాల్చి చంపేయండి.. ఉరితీయండి అని అధికార పక్షాన్ని, అధికార పక్షం ప్రతిపక్ష పార్టీకి చెందిన ప్రజాప్రతినిధుల్ని సంతలో మాదిరిగా కొనే సంప్రదాయాలు ప్రజాస్వామ్యాన్ని అపహాస్యం చేస్తున్నాయి. 2018లో తూ.గో జిల్లాలో ఉన్న ఈ సంఖ్యాబలం, ప్రేమ 2009లో నాకు లేదా? 2014లో లేదా?.. ఎన్నికల్లో ఎందుకు పోటీ చేయలేదంటే.. ఒక పోలీస్‌కానిస్టేబుల్‌ అవ్వాలన్నా శిక్షణ అవసరం. గెజిటెడ్‌ ఆఫీసర్‌ అవ్వాలన్నా ఎగ్జామ్‌ రాయాలి. అలాంటిది ఇన్నికోట్ల మంది ప్రజాజీవితాన్ని శాసించే ఒక రాజకీయ పార్టీని నడిపే వ్యక్తికి అనుభవం ఉండాలని నేను కోరుకుంటాను’’ అని తెలిపారు. ‘‘2014 ఎన్నికల్లో అనుభవంతో కూడిన ఒక సీనియర్‌ నాయకుడు చంద్రబాబు రాష్ట్రంలో ఉన్నారు. ఆయనకు మద్దతిస్తే రాష్ట్ర ప్రజలకు న్యాయం చేస్తారని నమ్మాను. ఏమూలకెళ్లినా సమస్యలు పరిష్కరిస్తానని అన్నారు. నా స్వప్రయోజనాల కోసం పార్టీ పెట్టలేదు. సామాజిక, దేశ, రాష్ట్ర ప్రయోజనాల కోసం పెట్టాను. 2014లో ఓట్లు చీల్చి రాష్ట్ర పరిస్థితిని అస్తవ్యస్తం చేయడం ఇష్టంలేక దేశభక్తితో రాష్ట్రం కోసం నేను పోటీ చేయకుండా చంద్రబాబుకు మద్దతు ఇచ్చాను. ఒక్క రోజు పార్టీ జెండా మోస్తేనే పదవులు అడిగే సమాజం ఇది. సినిమాలే నా సర్వస్వంగా ఉండేది. సినిమాలు తీస్తే ఏడాదికి రూ.100 కోట్లు సంపాదించగలను. పోరాటం చేయగలిగే సత్తా ఉన్నందునే రాజకీయాల్లోకి వచ్చాను. నా వద్ద రూ.కోట్లు లేవు. దేశంపై ప్రేమ ఉంది. నా అన్నదమ్ములు, ఆడపడుచులపై ప్రేమ ఉంది. అందుకే ఏమీ ఆశించకుండా రాష్ట్రానికి మంచి పరిపాలన అందించాలని ఆనాడు చంద్రబాబుకు మద్దతిచ్చా. అమరావతిలో ఇన్నేళ్లలో నాకు ఓ పార్టీ భవనం నిర్మించేందుకే కుదరలేదు. నా భావజాలం నచ్చి ప్రజలు నాకు సహకరించారు. జనసేన పార్టీ ప్రజల్లోకి వెళ్లకూడదనీ.. జనసేన తెదేపా పల్లకీనే మోయాలనేదే చంద్రబాబు ఆలోచన. తెదేపాను మోయడం కోసం జనసేన పెట్టలేదు. రాష్ట్రాన్ని అభివృద్ధి చేస్తారనే ఆయనకు అండగా ఉన్నా. బలమైన వ్యవస్థ ఉండాలని కోరుకున్నా’’ అని స్పష్టంచేశారు.

More News

Leave a Reply

Your email address will not be published. Required fields are marked *

*

Enable Google Transliteration.(To type in English, press Ctrl+g)

© 2018 TNILIVE. All rights reserved. Write to us with suggestions, comments and questions - editor.tnilive@gmail.com