అవకాశవాదంపై చంద్రబాబు ప్రసంగం

ఆనాడు కాంగ్రెస్‌ పార్టీ తెలంగాణ ఇస్తే అప్పుడు పొగిడి, ఇప్పుడు అదే పార్టీని, సోనియాగాంధీని కేసీఆర్‌ విమర్శిస్తున్నారని ఏపీ ముఖ్యమంత్రి చంద్రబాబునాయుడు విమర్శించారు. ఖమ్మం జిల్లా అశ్వారావు పేట నియోజకవర్గంలోని దమ్మపేటలో చంద్రబాబు మహాకూటమి తరఫున ఎన్నికల ప్రచారంలో పాల్గొని ప్రసంగించారు. కేసీఆర్‌ పచ్చి అవకాశవాది అని ధ్వజమెత్తారు. కేసీఆర్‌కు రాజకీయమే కావాలని, ఆయనకు తెలంగాణ అభివృద్ధి పట్టదని విమర్శించారు. “కేసీఆర్‌ ముఖ్యమంత్రి అయితే రాష్ట్రానికి న్యాయం జరుగుతుందని మీరంతా ఆశించారు. కానీ ఏమీ జరగలేదు. కేసీఆర్‌ ఎక్కడి నుంచో రాలేదు. తెదేపాలోనే మంత్రిగా పనిచేశారు. మరో దఫాలో ఆయనకు మంత్రి పదవి ఇవ్వనందుకు కోపంతో బయటికెళ్లి తెరాస పార్టీ పెట్టారు. అప్పుడే నేను పదవి ఇచ్చి ఉంటే.. మన దగ్గరే ఉండేవారు. కేసీఆర్‌ పచ్చి అవకాశవాది. ఆయనకు రాజకీయమే కావాలి. తెలంగాణ అభివృద్ధి ఆయనకు పట్టదు. ధనిక రాష్ట్రమైన తెలంగాణ ప్రజలకు మెరుగైన సేవలు అందించి ఉండాలి. కానీ కేసీఆర్‌ కుటుంబమే మెరుగైన జీవితం అనుభవిస్తోంది. సంక్షేమ పథకాలు తెలంగాణలో ఎలా ఉన్నాయి.. ఏపీలో ఎలా ఉన్నాయో మీరు ఒకసారి బేరీజు వేసుకోండి. ప్రజలకు అందుబాటులో ఉండని కేసీఆర్‌ ఇప్పుడొచ్చి అడిగితే ఓట్లు వేయాలా? ఇప్పటివరకూ మిషన్‌ భగీరథ నీళ్లే రాలేదు. నీళ్లు రాకపోతే ఓట్లు అడగనని తొలుత చెప్పిన కేసీఆర్‌.. ఇప్పుడు ఏ ముఖం పెట్టుకొని అడుగుతున్నారు. డబుల్‌ బెడ్‌రూం ఇళ్లు కట్టిస్తామన్నారు. ఒక్క ఇల్లు కూడా కట్టలేదు. లోటు బడ్జెట్‌లో ఉన్నా ఏపీలో 10 లక్షల ఇళ్లు కట్టాం. మొత్తం 25 లక్షల ఇళ్లు మంజూరు చేశాం. తెలంగాణలో అద్దె ఇంట్లో ఉండే వాళ్లకి 50 వేలు గ్రాంట్‌ ఇచ్చి, ఇళ్లు కట్టించే బాధ్యత ప్రజా కూటమి తీసుకుంటుంది. మీ జీవితాల్లో వెలుగు నింపుతుంది. రైతులకు రూ.2 లక్షల రుణ మాఫీ ఇవ్వబోతున్నాం.’’ అని చంద్రబాబు అన్నారు.

More News

Leave a Reply

Your email address will not be published. Required fields are marked *

*

Enable Google Transliteration.(To type in English, press Ctrl+g)

UCPL-TNILIVE

© 2018 TNILIVE. All rights reserved. Write to us with suggestions, comments and questions - editor.tnilive@gmail.com