నోరు మూసుకుని ఇండియా వెళ్లాల్సిందే-యుకె కోర్టు

దేశంలో బ్యాంకులకు సుమారు రూ.9వేల కోట్లు ఎగవేసిన విజయ్‌ మాల్యాకు బ్రిటన్‌ కోర్టులో గట్టి ఎదురు దెబ్బ తగిలింది. మాల్యాను భారత్‌కు అప్పగించాలన్న వాదనను బ్రిటన్‌ కోర్టు సమర్థించింది. 14 రోజుల్లోపు కోర్టు తీర్పుపై హైకోర్టులో అప్పీల్‌ చేసుకొనేందుకు అవకాశం ఇచ్చింది. వెస్ట్‌మినిస్టర్‌ కోర్టులోని ప్రధాన న్యాయమూర్తి ఎమ్మా అర్బుత్నోట్‌ నేడు ఈ తీర్పును వెలువరించారు. తీర్పు అనంతరం ఈ నిర్ణయం యుకే హోమ్‌ ఆఫీస్‌లోని హోమ్‌ సెక్రటరీకి చేరుతుంది. ఆయన తీర్పు ఆధారంగా ఆదేశాలు జారీ చేస్తారు. కోర్టు నిర్ణయంపై సీబీఐ ప్రతినిధి స్పందించారు. ఈ నిర్ణయాన్ని తాము స్వాగతిస్తున్నామని తెలిపారు. త్వరలోనే కేసును ముగించి మాల్యాను భారత్‌ తీసుకొస్తామని వెల్లడించారు. ఈ కేసు కోసం సీబీఐ చాలా కష్టపడిందని పేర్కొన్నారు. తాము చట్టపరంగా, ఆధారాల పరంగా బలంగా తమ వాదనలు వినిపించామని తెలిపారు. ఇప్పటికే భారత్‌ నుంచి సీబీఐ, ఈడీ అధికారుల బృందం యూకేకు వెళ్లిన విషయం తెలిసిందే. తీర్పుకు ముందు విజయ్‌మాల్యా కోర్టు వెలుపల మీడియాతో మాట్లాడుతూ.. ‘‘నేను బ్యాంకుల సొమ్ము దోచుకున్నాను అనే ఆరోపణలను అంగీకరించను. నేను బ్యాంకుల అసలు మొత్తాన్ని తిరిగి చెల్లిస్తానన్నది అవాస్తవం కాదుగా!’’ అని ఆయన వ్యాఖ్యానించారు. గత ఏడాది నుంచి మాల్యా బెయిల్‌పై ఉన్నారు. మాల్యా చేసిన నేరాలకు శిక్షను అనుభవించాల్సిందేనని కింగ్‌ఫిషర్‌‌ మాజీ ఉద్యోగిని (హెచ్‌ఆర్ ‌మేనేజర్‌)నీతూ శర్మ అన్నారు. ఈ కేసు కేవలం బ్యాంకుల అప్పుల చెల్లింపు పై మాత్రమే కాదన్నారు. దీనిలో మనీలాండరింగ్‌ వంటి చాలా నేరపూరిత అంశాలు ఉన్నాయని.. వాటి పర్యవసనాలను ఎదుర్కొవాల్సిందేనని పేర్కొన్నారు. తాను కోర్టులో కేసు ఓడిపోతానన్న విషయం విజయ్‌ మాల్యాకు ముందే స్పష్టంగా అర్థమైంది. అందుకే ఆయన తీర్పునకు కొన్ని రోజుల ముందు నుంచే బ్యాంకులకు అసలు మొత్తాన్ని చెల్లించడంపై ట్వీట్లు చేశారు. తాను నష్టపోయానని చెప్పుకొనే ప్రయత్నం కూడా చేశారు. తొలుత భారత్‌లో జైళ్ల పరిస్థితి ఘోరంగా ఉందని మాల్యా కోర్టుకు వెల్లడించారు. దీంతో భారత అధికారులు ముంబయిలో ఆర్థర్‌ రోడ్డులోని జైలును ప్రత్యేకంగా మాల్యా కోసం సిద్ధం చేసి ఆ వీడియోను లండన్‌ కోర్టుకు సమర్పించారు. గతంలో ఇదే జైల్లో ముంబయి దాడుల ఉగ్రవాది కసబ్‌ కూడా ఉన్నాడు. ఇది అత్యంత కట్టుదిట్టమైన జైలుగా పేరుంది. ‘‘మేము ఆయన ఉండటానికి అన్ని ఏర్పాట్లు చేశాము. ఒక్కసారి ఆయన ఇక్కడికి వస్తే రక్షణ, భద్రత బాధ్యతలను మేము చూసుకొంటాము.’’ అని జైలు అధికారి ఒకరు తెలిపారు.

More News

Leave a Reply

Your email address will not be published. Required fields are marked *

*

Enable Google Transliteration.(To type in English, press Ctrl+g)

UCPL-TNILIVE

© 2018 TNILIVE. All rights reserved. Write to us with suggestions, comments and questions - editor.tnilive@gmail.com