యువ కథానాయకుడు అక్కినేని అఖిల్‌ కొత్త సినిమా ప్రారంభమైంది. బొమ్మరిల్లు భాస్కర్‌ ఈ సినిమాకు దర్శకత్వం వహించబోతున్నారు. గోపీ సుందర్‌ బాణీలు సమకూరుస్తున్నారు. జీఏ 2 ప్రొడక్షన్స్‌ పతాకంపై బన్నీ వాసు, వాసు వర్మ నిర్మిస్తున్న ఈ చిత్రాన్ని అల్లు అరవింద్‌ సమర్పించబోతున్నారు. శుక్రవారం ఈ సినిమా పూజా కార్యక్రమాల్ని నిర్వహించారు. చిత్ర బృందంతోపాటు నాగార్జున, అమల కూడా ఈ కార్యక్రమానికి హాజరయ్యారు. అల్లు అరవింద్‌ మనవడు, మనవరాలు కూడా సందడి చేశారు.అఖిల్‌ కథానాయకుడిగా నటించిన మూడో సినిమా ‘మిస్టర్‌ మజ్ను’ ఈ ఏడాది ప్రారంభంలో ప్రేక్షకుల ముందుకు వచ్చింది. వెంకీ అట్లూరి దర్శకత్వం వహించిన ఈ సినిమాను బీవీఎస్‌ఎన్‌ ప్రసాద్‌ నిర్మించారు. ఎన్నో అంచనాల మధ్య వచ్చిన సినిమా ఆశించిన స్థాయిలో విజయం సాధించలేకపోయింది.
