రోగిష్టి వృద్ధులు భారతదేశంలోనే ఎక్కువ

జపాన్‌, స్విట్జర్లాండ్‌లలో నివసిస్తున్న వారితో పోలిస్తే భారతీయుల్లోనే ఎక్కువమంది వయసుతో పాటు వచ్చే అనారోగ్యాల బారిన పడుతున్నట్లు తాజా అధ్యయనం వెల్లడించింది. సాధారణంగా వయోధికుల్లో చాలామంది వివిధ వ్యాధుల బారిన పడటంతో పాటు, పలు సందర్భాల్లో గాయాల పాలవడం వంటివి కూడా సంభవిస్తుంటాయి. ఇలాంటి పరిస్థితులు ఏయే దేశాల్లో ఎలా ఉన్నాయన్న విషయమై అమెరికాకు చెందిన పరిశోధకులు తొలిసారిగా విస్తృత అధ్యయనం నిర్వహించారు. వాషింగ్టన్‌ విశ్వవిద్యాలయ పరిశోధకులు, వారి సహచరులు 1990 – 2017 మధ్య 195 దేశాలు, ప్రాదేశికాల్లో ఈ పరిశోధనలు జరిపారు. సగటున 65 ఏళ్ల వయసున్న వారిని అధ్యయనానికి ఎంచుకున్నారు. అనారోగ్యాలతో వార్ధక్యం భారంగా మారిన ప్రజల సగటు వయసు స్విట్జర్లాండ్‌, జపాన్‌లలో 76 ఏళ్లు. ప్రపంచంలోనే ఈ దేశాల్లో పరిస్థితి మెరుగ్గా ఉండగా.. అత్యంత ప్రతికూలంగా ఉన్న పపువా న్యూగినియాలో ఇలాంటి సగటు వయసు కేవలం 46 ఏళ్లు. ఇది భారత్‌లో 60 ఏళ్లుగా తేలింది. వయోధికుల్లో శారీరక, మానసిక, అభిజ్ఞ సామర్థ్యాలను దెబ్బతీస్తున్న 92 రకాల అనారోగ్యాలపై ఈ అధ్యయనం సాగింది. ఇందులో 5 అంటు వ్యాధులు, 81 ఇతర రోగాలు కాగా మరో 6 గాయాలకు సంబంధించినవి. అనారోగ్యం కారణంగా చాలామంది వార్ధక్య జీవితాన్ని భయంగా గడుపుతున్నట్లు ప్రధాన అధ్యయనకర్త ఏంజెలా వై చాంగ్‌ తెలిపారు. వయసుతో వచ్చే సమస్యలు – త్వరగా పదవీ విరమణ చేయడం, తమ పనులు తాము చేసుకోలేని పరిస్థితికి చేరడం, ఆరోగ్యంపై ఎక్కువ ఖర్చు చేయడానికి దారితీస్తున్నట్లు తెలిపారు. ఈ విషయమై ప్రభుత్వాలు దృష్టి సారించాల్సిన అవసరం ఉందన్నారు. ఇలాంటి అధ్యయనం జరపడం ఇదే తొలిసారిగా చాంగ్‌ తెలిపారు. 2017లో ప్రపంచంలోనే అత్యధికంగా పపువా న్యూగినియాలో ప్రజలు ఇలాంటి ఇబ్బందులు ఎదుర్కొంటున్నారు. ప్రతి వెయ్యిమంది వయోధికుల్లో 500కు పైగా అనారోగ్యానికి గురవుతున్నారు. అదే స్విట్జర్లాండ్‌లో దాదాపు 100 మందికి (వెయ్యి మందికి గాను) మాత్రమే ఇలాంటి సమస్యలున్నాయి.

More News

Leave a Reply

Your email address will not be published. Required fields are marked *

*

Enable Google Transliteration.(To type in English, press Ctrl+g)

UCPL-TNILIVE

© 2018 TNILIVE. All rights reserved. Write to us with suggestions, comments and questions - editor.tnilive@gmail.com