USA..డల్లాస్‌లో ఎస్‌బీఐ ఛైర్మన్ పర్యటన

ప్రభుత్వ రంగ సంస్థ స్టేట్ బ్యాంకు ఆఫ్ ఇండియా ఛైర్మన్ శ్రీనివాసులుశెట్టి అమెరికా పర్యటనలో భాగంగా డల్లాస్ పరిసర ప్రాంతమైన అర్వింగ్‌లోని మహాత్మగాంధీ స్మారకస్థలిని సందర్శించి గాంధీజికి నివాళి అర్పించారు. ఫ్రిస్కో నగరంలో ఇటీవలే ఎస్‌బీఐ బ్రాంచిని ఏర్పాటు చేశారు. ఈ క్రమంలో ఆయన అమెరికాలో పర్యటిస్తున్నారు. 18ఎకరాల విస్తీర్ణంలో అమెరికాలోనే మహాత్ముని అతిపెద్ద స్మారకస్థలిని రూపొందించిన కమిటీ సభ్యులను శ్రీనివాసులు అభినందించారు. 12వసంతాలు పూర్తి చేసుకున్న సందర్భంగా శుభాకాంక్షలు తెలిపారు. కార్యక్రమంలో స్మారకస్థలి కమిటీ ఛైర్మన్ డా. ప్రసాద్ తోటకూర, వ్యవస్థాపక కార్యదర్శి రావు కల్వల, ఇండియా అసోసియేషన్ ఆఫ్ నార్త్ టెక్సస్ అధ్యక్షుడు మహేంద్ర రావు తదితరులు పాల్గొన్నారు.

జోగులాంబ గద్వాల జిల్లా పెదపోతులపాడు గ్రామానికి చెందిన శ్రీనివాసులు ప్రభుత్వ పాఠశాలల్లో విద్యనభ్యసించి స్టేట్ బ్యాంకులో సాధారణ ఉద్యోగిగా జేరి అంచలంచెలుగా ఎదిగి ఛైర్మన్ స్థాయికి చేరుకున్నారు. 2024లో భారత ప్రభుత్వంచే నియమింపబడిన ఆయన 2027 వరకు ఈ పదవిలో కొనసాగుతారు.