తానా ప్రపంచసాహిత్యవేదిక 97వ సమావేశం..అవధాన గురుభ్యోనమః

తానా సాహిత్య విభాగం ‘తానా ప్రపంచసాహిత్యవేదిక’ ఆధ్వర్యంలో గత ఆరున్నర సంవత్సరాలగా “నెల నెలా తెలుగు వెలుగు” పేరిట ప్రతి నెలా ఆఖరి ఆదివారం అంతర్జాతీయ అంతర్జాల దృశ్యసమావేశాలు నిర్వహిస్తున్నారు. ఇందులో భాగంగా 97వ అంతర్జాల సమావేశం అవధాన గురుభ్యోనమః పేరిట నిర్వహించారు. సమన్వయకర్త చిగురుమళ్ళ శ్రీనివాస్ స్వాగతోపన్యాసంతో ఈ కార్యక్రమం ప్రారంభమయింది. ప్రత్యేక అతిథి సహస్రావధాని డా. కడిమిళ్ళ వరప్రసాద్ మాట్లాడుతూ అవధాన రంగంలో సుప్రసిద్ధులైన వారిలో ఆరుగురు అవధానులు ఒకే వేదికపై పాల్గొని తమను అవధానులుగా తీర్చిదిద్దిన గురువులకు కృతజ్ఞతలు తెలియజేయడం ఇదే తొలిసారి అని తెలిపారు. కార్యక్రమానికి శ్రీకారం చుట్టిన తానా ప్రపంచసాహిత్యవేదిక నిర్వాహకులు డా. ప్రసాద్ తోటకూర వారి బృందం అభినందనీయులు అన్నారు. తెలుగు వారికే సొంతమైన అవధాన ప్రక్రియను పరిరక్షిస్తున్న అవధానులకు ఆశీస్సులు అందజేశారు. వీరిని స్పూర్తిగా తీసుకుని అవధానులు తయారు కావాలని ఆకాంక్షించారు.

డా. ప్రసాద్ తోటకూర మాట్లాడుతూ – ఏకాగ్రత, జ్ఞాపకశక్తి, ఆశుకవిత్వం, సమయస్ఫూర్తి, సృజనాత్మకత కలగలిసిన అరుదైన ప్రతిభ అవధాన ప్రక్రియ అని అలాంటి విద్యను మనకు వారసత్వంగా అందించిన, అందిస్తున్న సాహితీమూర్తులకు, అవధాన గురువులందరికీ ధన్యవాదాలు తెలిపారు. ఈ అవధాన గురువందనం కార్యక్రమంలో సహస్రావధాని కోట వేంకట లక్ష్మీనరసింహం తన గురువు డా. కడిమిళ్ళ వరప్రసాద్ గురించి, శతావధాని డా. ఆముదాల మురళి తన గురువు "పద్మశ్రీ" డా. ఆశావాది ప్రకాశరావు గురించి, ద్విశతావధానిని డా. బులుసు అపర్ణ తన గురువు డా. ధూళిపాళ మహాదేవమణి గురించి, అష్టావధాని డా. బోచ్కర్ ఓమ్ప్రకాశ్ తన గురువులు డా. అవధానం రంగనాథ వాచస్పతి, డా. ఆయాచితం నటేశ్వరశర్మ, డా. పాలపర్తి శ్యామలానంద ప్రసాద్ గురించి, శతావధాని నల్లాన్ చక్రవర్తుల సాహిత్ తన గురువులు పద్మశ్రీ డా. ఆశావాది ప్రకాశరావు, అన్నమరాజు ప్రభాకరరావు, డా. పాలపర్తి శ్యామలానంద ప్రసాద్, డా. ఆముదాల మురళిల గురించి, అష్టావధాని యర్రంశెట్టి ఉమామహేశ్వరరావు తన గురువులు డా. ఉమర్ ఆలీషా, ఏ. సచ్చిదానందమూర్తిల గురించి ప్రస్తుతించారు.