రాజీలేని పాలన సాగించిన జగన్ - డల్లాస్‌లో ధనంజయరెడ్డి

ఏపీ మాజీ ముఖ్యమంత్రి వై.ఎస్.జగన్మోహన్‌రెడ్డి రాజీలేని పాలన చేశారని వైద్య, ఆరోగ్య రంగాల్లో పెనువిప్లవాలు తీసుకువచ్చి యావత్ దేశానికి ఆదర్శంగా నిలిచారని ఆయన సెక్రటరీగా పనిచేసిన రిటైర్డ్ ఐ.ఏ.ఎస్. అధికారి కె.ధనంజయరెడ్డి అన్నారు. శుక్రవారం నాడు అర్వింగ్‌లో స్థానిక ప్రవాసులతో ఏర్పాటు చేసిన సమావేశంలో పాల్గొని ఆయన ప్రసంగించారు. కరోనా సమయంలో 26వేల కోట్లు రాబడి నష్టం, మరో 21వేల కోట్లు పథకాల ఖర్చు వెరసి మొత్తం 47వేల కోట్ల లోటు బడ్జెట్ ఉన్నప్పటికీ మేనిఫెస్టోలో చెప్పిన ప్రతి అంశాన్ని అమలుచేసి తీరాల్సిందేనని పట్టుబట్టి, మొండితనంగా, రాజీలేని పాలన చేసిన ఘనత జగన్‌కు దక్కుతుందని ఆయన అన్నారు. ఆరోగ్యశ్రీ, నాడు-నేడు వంటి పథకాలను భారత ప్రభుత్వం అధ్యయనం చేసి స్వారూప్యత ఉండే కేంద్ర ప్రభుత్వ పథకాలను ప్రవేశపెట్టిందని ఆయన గుర్తు చేశారు. కరోనా సమయంలో చేసిన సేవలకు WHO గుర్తింపు పొందిన ఏకైక దక్షిణాసియా రాష్ట్రంగా ఏపీ నిలిచిందని పేర్కొన్నారు. మేనిఫెస్టోలో చెక్‌మార్క్‌లు పెట్టుకుని ఖచ్చితంగా అన్నీ అమలు అయ్యకే ఎన్నికలకు వెళ్ల్లాలని జగన్ దీక్ష పూనారని తెలిపారు. దురదృష్టవశాత్తు తాము చేసిన పనులను ప్రజల్లోకి సరిగ్గా తీసుకుని వెళ్లలేకపోయామని అదే ఆయన ఓటమికి కారణం అయిందని విశ్లేషించారు.

తాను ఐ.ఏ.ఎస్. అవ్వాలని తన తండ్రి కన్న కలల కోసం కష్టపడుతున్న సమయంలో తమ ఊరిలో ఎన్నికలు వచ్చాయని, తనను నిలబెడితే ప్రత్యర్థులు ఏకగ్రీవంగా ఒప్పుకుంటామని చెప్పిన కారణంగా తాను గ్రామ సర్పంచ్ కావాల్సి వచ్చిందని ధనంజయరెడ్డి తెలిపారు. అలా సర్పంచ్‌గా ఉంటూనే ఢిల్లీలో సివిల్స్ శిక్షణ తీసుకుని ఐ.ఏ.ఎస్‌కు ఎంపిక అయ్యాయని తెలిపారు. ఈ సమయంలోనే వై.ఎస్‌తో మంచి అనుబంధం ఏర్పడిందని అది జగన్ వరకు కొనసాగిందని వెల్లడించారు.

సభలో ప్రసంగించిన వక్తలు కార్యకర్తల మనోభావాలను, కష్టాలను, అభిప్రాయలను అధినేత వద్దకు తప్పకుండా తీసుకువెళ్లాలని సూచించారు. గత ఎన్నికల్లో ఈవీఎంల పనితీరుపై పార్టీపరంగా విచారణ చేపట్టి నిజాలను వెలికితీయాలని కోరారు. కార్యక్రమంలో క్రిస్టపాటి రమణరెడ్డి, ప్రతాప్ భీమిరెడ్డి, కోడూరు కృష్ణారెడ్డి, రావు కల్వల, డా. శ్రీనాథ్, డా. పవన్, అన్నపురెడ్డి శివ, తిరుమల్ రెడ్డి, దర్గా నాగిరెడ్డి, డా. ఆళ్ల శ్రీనివాసరెడ్డి తదితరులు పాల్గొన్నారు.