న్యూజెర్సీలో ప్రధాని మోదీ 25 ఏళ్ల ప్రజాసేవా ప్రస్థాన వేడుకలు

భారత ప్రధానమంత్రి నరేంద్ర మోదీ 25 ఏళ్ల ప్రజాసేవా ప్రస్థానాన్ని పురస్కరించుకుని న్యూజెర్సీలో భారతీయ అమెరికన్ సమాజం ఆధ్వర్యంలో ప్రత్యేక వేడుకలు ఘనంగా నిర్వహించారు. 2001 అక్టోబర్ 7న గుజరాత్ ముఖ్యమంత్రిగా బాధ్యతలు చేపట్టిన మోదీ, 2014 మే నెల నుంచి భారత ప్రధానమంత్రిగా కొనసాగుతూ, దేశ అభివృద్ధికి అందిస్తున్న నాయకత్వాన్ని ఈ సందర్భంగా పలువురు వక్తలు కొనియాడారు. ఈ కార్యక్రమానికి ముఖ్య అతిథిగా పద్మశ్రీ పురస్కార గ్రహీత, కొలంబియా విశ్వవిద్యాలయానికి చెందిన ప్రముఖ ఆర్థికవేత్త డాక్టర్ నిరుపమ్ బాజ్‌పాయ్ పాల్గొని ప్రసంగించారు. 2001లో గుజరాత్‌లో సంభవించిన భూకంపం అనంతరం, భవిష్యత్తులో ప్రకృతి వైపరీత్యాలను సమర్థవంతంగా ఎదుర్కొనేందుకు శాస్త్రీయ పరిశోధనల ప్రాధాన్యతను అప్పటి ముఖ్యమంత్రి నరేంద్ర మోదీ గుర్తించారని ఆ దిశగా 2003లో గుజరాత్ ప్రభుత్వం ఇన్‌స్టిట్యూట్ ఆఫ్ సిస్మోలాజికల్ రీసెర్చ్‌ను స్థాపించిందని గుర్తుచేశారు. ఈ ప్రయత్నంలో కొలంబియా విశ్వవిద్యాలయం భాగస్వామ్యాన్ని వివరించిన ఆయన, శాస్త్రీయ పరిశోధనలకు మోదీ ఇచ్చిన ప్రాధాన్యతను ప్రత్యేకంగా ప్రశంసించారు. వాజ్‌పేయి, మోదీ సహా ముగ్గురు భారత ప్రధానమంత్రులకు సలహాదారుగా పనిచేసిన తన అనుభవాలను ఈ సందర్భంగా పంచుకున్నారు. మోదీ దార్శనికతకు అనుగుణంగా 2047 నాటికి భారతదేశం అభివృద్ధి చెందిన దేశంగా అవతరిస్తుందనే విశ్వాసాన్ని వ్యక్తం చేశారు.


ఓవర్సీస్ ఫ్రెండ్స్ ఆఫ్ బీజేపీ యూఎస్ఏ(OFBJP-USA) అధ్యక్షుడు డాక్టర్ అడపా ప్రసాద్ మాట్లాడుతూ నరేంద్ర మోదీ గుజరాత్ ముఖ్యమంత్రిగా ఆ రాష్ట్రాన్ని, భారత ప్రధానమంత్రిగా దేశాన్ని అభివృద్ధి పథంలో నడిపించారని పేర్కొన్నారు. సుపరిపాలన, వేగవంతమైన అభివృద్ధి, అన్ని రంగాల్లో సమగ్ర పురోగతికి మోదీ నాయకత్వం భవిష్యత్ తరాల నాయకులకు ఆదర్శంగా నిలుస్తుందని అన్నారు. మోదీ దూరదృష్టితో కూడిన నాయకత్వంలో భారతదేశం ప్రపంచంలో ఐదవ అతిపెద్ద ఆర్థిక వ్యవస్థగా ఎదగడమే కాకుండా, అత్యంత వేగంగా అభివృద్ధి చెందుతున్న ప్రధాన ఆర్థిక వ్యవస్థల్లో ఒకటిగా నిలిచిందని కొనియాడారు. OFBJP-USA ప్రధాన కార్యదర్శి డాక్టర్ వాసు పటేల్, మాజీ అధ్యక్షుడు కృష్ణారెడ్డి అనుగుల, తెలంగాణ కన్వీనర్ విలాస్ రెడ్డి జంబులాలు ప్రసంగిస్తూ మోదీకి అభినందనలు తెలిపారు. భజాపాకు అండగా నిలుస్తూ భారతదేశాన్ని ప్రపంచ నాయకత్వ స్థాయికి తీసుకెళ్లే ప్రయాణంలో తమ వంతు పాత్ర పోషిస్తామని అన్నారు. అమర్ గోస్వామి, కల్పనా శుక్లా, గుంజన్ మిశ్రా, అమిత్ పాండే, ఆనంద్ గుప్తా, ప్రదీప్ కట్టా, గోవింద్ రాజ్ తోట, గోపి సముద్రాల, శ్రవణ్ కల్సాని, మధు అన్న, రవిరెడ్డి తదితరులు పాల్గొన్నారు.