భవిష్యత్ టెక్నాలజీ కేంద్రంగా అమరావతి-న్యూజెర్సీలో మన్నవ

ఆంధ్రప్రదేశ్‌లో కూటమి ప్రభుత్వం చేపడుతున్న అభివృద్ధి కార్యక్రమాలు, టెక్నాలజీ రంగంలో తీసుకుంటున్న చర్యలు, అమరావతి అభివృద్ధి ప్రణాళికలను ఏపీ టెక్నాలజీ సర్వీసెస్ ఛైర్మన్ **మన్నవ మోహన కృష్ణ** అమెరికాలోని ఐటీ పారిశ్రామికవేత్తలకు వివరించారు. న్యూజెర్సీలో ప్రవాసాంధ్ర ఐటీ పారిశ్రామికవేత్తలతో జరిగిన సమావేశంలో రాష్ట్రంలో పెట్టుబడులు, పరిశ్రమల ఏర్పాటుకు ఉన్న అవకాశాలపై చర్చించారు. ముఖ్యమంత్రి నారా చంద్రబాబు నాయుడు నాయకత్వంలో, ఐటీ మంత్రి నారా లోకేష్ చొరవతో ఆధునిక టెక్నాలజీ రంగాల అభివృద్ధికి ప్రభుత్వం ప్రణాళికలు రూపొందిస్తోందని తెలిపారు.

అమరావతిలో ప్రతిపాదిత క్వాంటం వ్యాలీ ద్వారా క్వాంటం కంప్యూటింగ్, ఆర్టిఫిషియల్ ఇంటెలిజెన్స్, డీప్‌టెక్, పరిశోధన, ఆవిష్కరణల రంగాల్లో అవకాశాలను అభివృద్ధి చేయాలని ప్రభుత్వం లక్ష్యంగా పెట్టుకుందని మన్నవ మోహన కృష్ణ తెలిపారు. హైదరాబాద్ ఐటీ రంగ అభివృద్ధిలో చంద్రబాబు నాయుడు గతంలో పోషించిన పాత్రను ప్రస్తావిస్తూ, అదే అనుభవంతో అమరావతిలో టెక్నాలజీ ఆధారిత పరిశ్రమలకు అనుకూల వాతావరణం కల్పించేందుకు చర్యలు తీసుకుంటున్నట్లు చెప్పారు. అంతర్జాతీయ సంస్థలతో భాగస్వామ్యాలు, మౌలిక వసతుల అభివృద్ధి, పెట్టుబడులకు అనుకూల విధానాలపై ప్రభుత్వం దృష్టి సారించిందని మోహనకృష్ణ వివరించారు.

అమెరికాలోని తెలుగు పారిశ్రామికవేత్తలు తమ అనుభవం, పెట్టుబడులను ఆంధ్రప్రదేశ్‌తో అనుసంధానం చేసుకోవాలని మన్నవ మోహన కృష్ణ కోరారు. రాష్ట్రంలో పరిశ్రమల విస్తరణకు ప్రభుత్వం అవసరమైన సహకారం అందిస్తుందని, పెట్టుబడులు పెరగడం ద్వారా ఉపాధి అవకాశాలు కూడా మెరుగుపడతాయని తెలిపారు. రాష్ట్రంలో జరుగుతున్న అభివృద్ధి, టెక్నాలజీ రంగానికి ఇస్తున్న ప్రాధాన్యతపై సమావేశంలో పాల్గొన్న ఐటీ పారిశ్రామికవేత్తలు ఆసక్తి వ్యక్తం చేశారు. అమరావతిలో క్వాంటం వ్యాలీ, గూగుల్ వంటి అంతర్జాతీయ సంస్థలతో భాగస్వామ్యాల ద్వారా కొత్త అవకాశాలు ఏర్పడుతున్నాయని పేర్కొన్నారు.