బే-ఏరియాలో వీక్షణం సాహితీ సంస్థ 14వ వార్షికోత్సవం

కాలిఫోర్నియాకు చెందిన వీక్షణం సాహితీ సంస్థ 14వ వార్షికోత్సవ వేడుక బే-ఏరియా నెవార్క్‌లో రచయిత్రి షంషాద్-అబ్దుల్లాల గృహంలో ఏర్పాటు చేశారు. కౌముది పత్రిక కిరణ్ ప్రభ, నెచ్చెలి పత్రిక సంపాదకురాలు డా. కె. గీతామాధవి సభాధ్యక్షులుగా పాల్గొన్నారు. వెంకట్ నాగం రచించిన “రచ్చబండ చర్చలు”, “కలగూర గంప” పుస్తకాలను ఈ వేడుకలో ఆవిష్కరించారు. ఈ సందర్భంగా కిరణ్ ప్రభ మాట్లాడుతూ తెలుగు సాహిత్యంలో ప్రజలతో మమేకమయ్యే భాషలో ఆలోచనాత్మక కాలం శీర్షికలో పత్రికలలో రచనలు చేయడం ముఖ్యమని వివరించారు. వెంకట్ నాగం రచనలు సమాజంలోని విభిన్న అంశాలను స్పృశించాయి అని ప్రశంసించారు. వెంకట్ వ్యాస రచనా ప్రయాణం మరింత ఉజ్వలంగా కొనసాగాలని ఆయన ఆకాంక్షించారు. వీక్షణం వ్యవస్థాపకురాలు, సంధానకర్త, నెచ్చెలి పత్రిక ప్రధాన సంపాదకురాలు డా. కె. గీతామాధవి రచయిత సామాజిక దృక్పథాన్ని, సాహిత్య నిబద్ధతను ప్రశంసించారు. కార్యక్రమంలో రమణ, శారద కాశీవఝల, డా. సురేందర్ రెడ్డి, వాణి తదితరులు పాల్గొన్నారు.