లోకేష్ డల్లాస్ పర్యటనకు విస్తృత ఏర్పాట్లు

• డిసెంబరు 6న గార్లాండ్‌లో భారీ సభ
• 8వేల మంది హాజరవుతారని అంచనా
• ఎగుమతి-దిగుమతి వాణిజ్య బలోపేతంపై దృష్టి
• CXO క్లబ్ ద్వారా ప్రభుత్వంతో పెట్టుబడిదారుల అనుసంధానం
• APNRT వనరులను సద్వినియోగం చేసుకునేలా ప్రణాళిక
• TNIతో APNRT ఛైర్మన్ డా. వేమూరు రవికుమార్

ఏపీ ముఖ్యమంత్రి నారా చంద్రబాబునాయుడు అక్రమ అరెస్ట్ సమయంలో సంఘీభావంగా నిలబడటమే గాక, గత ఎన్నికల్లో కూటమి విజయానికి శ్రమించి ప్రభుత్వ ఏర్పాటులో కీలక పాత్ర పోషించిన ప్రవాసాంధ్రులను కలిసి, రాష్ట్రాభివృద్ధికి వారి నుండి మరింత చేయూతను అభ్యర్థించే నిమిత్తం ఏపీ విద్యా, ఐటీ శాఖామాత్యులు నారా లోకేష్ డిసెంబరు 6వ తేదీన డల్లాస్‌లో పర్యటిస్తున్నారని ఈ కార్యక్రమాన్ని సమన్వయపరుస్తున్న APNRT ఛైర్మన్ డా. వేమూరు రవికుమార్ తెలిపారు. ఈ సదస్సుకు సంబంధించిన విశేషాలను ఆయన TNIతో వెల్లడించారు.

ఎన్నారై తెదేపా-భాజపా-జనసేన శ్రేణులు ఈ కార్యక్రమ నిర్వహణలో కీలక పాత్ర పోషిస్తున్నారని, వచ్చే 6వ తేదీన డల్లాస్ పరిసర ప్రాంతమైన గార్లాండ్‌లోని కర్టిస్ కల్వెల్ సెంటరులో నిర్వహించే భారీ సదస్సులో ప్రవాసులను ఉద్దేశించి లోకేష్ ప్రసంగిస్తారని, వారికి ధన్యవాదాలు తెలుపుతారని, రాష్ట్రంలో పెట్టుబడులకు గల అవకాశాలను వివరిస్తారని రవి వెల్లడించారు. 8వేల మంది ప్రవాసులు అమెరికా-కెనడా దేశాల నుండి హాజరవుతారనే అంచనాల నడుమ ఈ సభకు భారీ ఏర్పాట్లు చేస్తున్నామని ఆయన తెలిపారు.

ప్రస్తుతం ఆంధ్రప్రదేశ్ రాష్ట్ర ఎగుమతుల వర్తకం సుమారు రూ.17.92 లక్షల కోట్లు ఉండగా, దిగుమతులు రూ.11.65 లక్ష కోట్లకు చేరాయని, ఈ వర్తకాన్ని మరింతగా విస్తరించడం ద్వారా రాష్ట్ర ఆర్థిక ప్రగతిని వేగవంతం చేయాలనే లక్ష్యంతో లోకేష్ అమెరికా పర్యటనను వ్యూహాత్మకంగా ఉపయోగించుకోవాలనుకుంటున్నారని రవి తెలిపారు. విదేశీ మార్కెట్లలో ఆంధ్రప్రదేశ్ పరిశ్రమలకు ఉన్న అవకాశాలను పెంపొందించడం, అంతర్జాతీయ వాణిజ్య ప్రవాహాన్ని బలోపేతం చేయడం ప్రధానాంశాలుగా ఆయన పర్యటన సాగుతుందని వివరించారు.

ఏపీ ఎగుమతి-దిగుమతి అవకాశాలు, రాష్ట్ర ప్రభుత్వం అందించే ప్రోత్సాహకాలు, సబ్సిడీలు, గ్రాంట్లు, పారిశ్రామిక విధానాలపై సమగ్ర అవగాహన కల్పించేందుకు సభాస్థలి వద్ద APNRT డెస్క్ ఏర్పాటు చేశామని, ఆసక్తి కలిగిన పెట్టుబడిదారులకు త్వరలో వర్క్‌షాప్లను నిర్వహిస్తామని పేర్కొన్నారు. ప్రపంచవ్యాప్తంగా 140 దేశాల్లో విస్తరించి ఉన్న సుమారు రెండు లక్షల మంది APNRT సభ్యుల నెట్‌వర్క్‌ను వినియోగించి ఎగుమతి-దిగుమతి వర్తకాన్ని బలోపేతం చేయడం లక్ష్యంగా పెట్టుకున్నట్లు రవి వివరించారు. దీనితో పాటు APNRT CXO Club ద్వారా 2000 మంది CXOలను (CEO, CTO, CFO, CSO, CIO) ఆంధ్రప్రదేశ్‌తో అనుసంధానించాలనే లక్ష్యంతో కార్యక్రమానికి రూపకల్పన చేశామని...వీరికి సింగిల్ విండో సిస్టం, ప్రభుత్వ సహకారం, ప్రత్యేక సదుపాయల వంటివాటిపైన కూడా ఈ సదస్సులో మౌలిక సమాచారాన్ని అందజేస్తామని తెలిపారు.

డల్లాస్ పర్యటన అనంతరం 8,9 తేదీల్లో లోకేష్ శాన్‌ఫ్రాన్సిస్కోలో పలు కంపెనీల ప్రతినిధులతో భేటీ అవుతారని రవి తెలిపారు. రాష్ట్రాభివృద్ధిలో ఎన్‌ఆర్‌ఐల పాత్రను బలపరచడం, వారి నెట్‌వర్క్‌ను ఆంధ్రప్రదేశ్ వ్యాపార వృద్ధికి నేరుగా అనుసంధానించడం, ఆంధ్రప్రదేశ్ అభివృద్ధిలో వారి భాగస్వామ్యాన్ని మరింత విస్తరించేందుకు లోకేష్ పర్యటన తోడ్పడుతుందని రవికుమార్ ఆశాభావాన్ని వ్యక్తపరిచారు. ఈ సదస్సును విజయవంతం చేయవల్సిందిగా ఆయన కోరారు.

Tags-Nara Lokesh 2025 December Dallas Tour Details

Gallery

JOIN OUR WHATSAPP CHANNEL FOR MORE UPDATES